109. Þarf markaðsetning að kosta mikla peninga?

“Ef gottið er gott, heitir gottið Freyja” var sagt hér um árið í auglýsingarherferð fyrir Freyju sælgæti. Hér var á ferðinni afar gott slagorð sem ég hef grun um að hafi sett mark sitt í hugum Íslendinga sem heyrðu það á öldum ljósvakans. Hver sá sem fer í gang með verkefni, sem ætlað er að vera fyrirtæki sem selur vörur, verður að átta sig á því að það þarf að markaðssetja hverja vöru og þjónustu. Ég geri fastlega ráð fyrir að þetta séu í raun engin ný sannindi fyrir fólki, en ég hef grun um að margir telji að það þurfi að kosta mikla peninga og eins og von er með ný verkefni þá eru peningar ekki það sem nóg er af.

Það sem skiptir máli í þessu samhengi, og er kjarni þessarar umræðu minnar í dag, er undirbúningurinn. Með góðum undirbúning og réttri vinnu, eru líkur á að hægt sé að koma í veg fyrir þá leiðinlegu stöðu að vera að fara í gang með verkefni og hafa ekki efni á að markaðssetja það, því peninginn þraut. Það eru nokkur atriði sem ég vil taka fram að skipti mestu í þessu samhengi.

Skipulagning verkefnis og góð rannsókn á markhópum vörunnar eða þjónustunnar, gefur innsýn inn í hvaða þarfir þeir markhópar hafa.

Með því að reikna með frá upphafi að ákveðin upphæð af stofnfé fari í markaðsstarf, er hægt að koma í veg fyrir að fé sé ekki til þegar selja á vöruna.

Með því að selja fyrst eina vöru og svo næstu, er hægt að lækka kostnað og hámarka árangur, því arður af einni vöru getur nýst í að markaðssetja næstu.

Með því að hafa sterka tilfinningu fyrir bæði vandamálinu sem verið er að leysa, vörunni eða þjónustunni sem leysa á vandamálið, og markhópnum sem leitar að lausninni, þá er hægt að vinna snemma í því að búa til slagorð sem nota ætti við markaðsstarf.

Með því að velja strax í upphafi með hvaða hætti mestur árangur næst í markaðsstarfi má minnka líkur á að auglýst sé á röngum stöðum og að peningur fari í súginn.

Með því að fá hjálp frá fólki sem hefur tengsl, má oft auglýsa fyrir minni upphæðir þó sérstaklega ef auglýsingin fer frá manni til manns í góðu umtali eða umsögn um gæði og ágæti vöru eða þjónustunnar.

Kæri lesandi. Að markaðssetja vöru eða þjónustu er einn af hornsteinum þess að ná árangri og mikilvægt er að það sé gert rétt. Ef varan eða þjónustan er vanhugsuð eða vanþróuð, verður mun erfiðara að auglýsa hana og ná til markhóps. Ef verð er ekki rétt þá mun árangur einnig láta á sér standa. Ef þú hefur hinsvegar hugsað fyrir þessu öllu áður en farið er af stað eru líkur á að árangur verði eftir óskum. Það er hinsvegar meira mál en maður heldur og gott að leita sér ráðgjafar hvað það varðar, því það getur skipt sköpum í framtíðar árangri. Að kasta aurnum í upphafi þýðir með öðrum orðum að þú kastar krónunni seinna í ferlinum. Eins og slagorðið “Just do it” segir mikið um bæði vöruna, vörumerkið og verðmæti þess, þá segi ég við þig, hafðu samband.

108. Góður fókus frumkvöðuls er gulli betri.

Af mörgum þáttum sem tengjast því að koma hugmynd í framkvæmd, er einn þáttur einna mikilvægastur í mínum huga. Þessi þáttur nefnist fókus. Hver frumkvöðull, hverra hæfileika eða hugmynda hann er með, þarf ávallt að hafa góðan, sterkan og skýran fókus á því hver eru aðalatriðin og hver eru aukaatriðin í ferlinum til árangurs. Ef frumkvöðul skortir fókus, er hættan á að markmið eða áætlanir nái ekki fram að ganga. Ástæðan fyrir því að ég dreg þetta upp er einkum sú vitneskja að margir frumkvöðlar eru það sem kallað er sveimhugar. Að vera sveimhuga er ekki og alls ekki eitthvað neikvætt, þvert á móti er það jákvætt og þó sérstaklega í samhengi við frumkvöðla. Frumkvöðlar væru ekki frumkvöðlar nema vegna þess að þeir eru sveimhugar, því sá eiginleiki hjálpar frumkvöðlum að vera bæði skapandi og bjartsýnir. Það er líka einmitt það sem gerir þeim erfiðast fyrir að vera fókuseraðir, því þegar hugmyndir reika fram og til baka, getur á stundum verið erfitt að láta hugmyndina reika eftir beinni línu, ef þú skilur. Og að láta hugmynd reika eftir beinni línu er sá fókus sem ég er að tala um. Málið er að það er ekki þannig að viðkomandi frumkvöðull þurfi að mínu mati að verða meistari í að láta reika eftir beinni línu, heldur miklu frekar að gera sér grein fyrir því hversu hæfur sá hinn sami er í þessari iðju, og hvort þörf sé á því að hafa einstakling með sér sem getur séð um að halda fókusi á verkefni því sem er í gangi hverju sinni. Þetta tengist auðvitað því sem ég kalla tengslamyndun, en hún gerir hverjum einstakling það mögulegt að ná meiri árangri en ætla mætti í upphafi því margar hendur vinna oftast meira og léttara verk en ein.

Það er líka þannig að það er mikilvægt að vera með réttan fókus hverju sinni. Það sem ég á við er að það er ekki í raun nóg að hafa fókus því ef fókusinn er rangur þá er stefnt í vitlausa átt og þá mun árangur verða annar er ætlað var í upphafi.  Þess vegna er mikilvægt að frumkvöðullinn sjálfur sjái í raun um að vita hvar og hvernig fókus þarf að vera og  með hvaða hætti þarf að framfylgja réttum fókus og hver sé bestur að halda þeim fókus sem þarf. Það er auðvitað augljóst mál að mikilvægi frumkvöðulsins í þessu máli er gríðarlegur eins og gengur einnig með að koma hugmyndum í framkvæmd. Ef frumkvöðullinn er ekki með hausinn skrúfaðan rétt á og ekki inni í öllum þeim mikilvægu hlutum sem koma að framkvæmd verkefnisins.....er hættan sú að fyrirhöfnin sé fokin út í veður og vind.

Kæri lesandi, ef þú ert með hugmynd og skortir fókus, gæti ég komið þér á rétt spor. Hafðu endilega samband og sjáum hvort við getum ekki rætt saman um næstu skref. Ég hlakka til að heyra frá þér.

107. Hversu mikilvægt er að hafa heimasíðu við stofnun fyrirtækis?

Þessi spurning er efalaust eitthvað sem margir spyrja sig við upphaf stofnun fyrirtækis í dag. Ástæðan er frekar einföld. Nærri allir nota netið með einum eða öðrum hætti og flestir vinna við tölvu eða eru með tölvu heima hjá sér og m.a. sækja sér nú til dags netpóst í meira mæli en þeir taka við símtölum. Heimasíður er verkfæri til að nota en eins og með svo margt annað þá er ekki nóg að setja upp heimasíðu og það er heldur ekki alveg saman hvernig heimasíðan er gerð eða lítur út. Þar koma inn margir þættir sem geta skipt máli og er mikilvægt að það sé gert með réttum hætti. En hvað er heimasíða? Heimasíða er miðill einhvers sem vill hafa andlit út á við og oftast til annarra en þess sem setur upp heimasíðuna eða fær hana gerða. Heimasíða er upplýsingamiðill um ákveðna t.d. starfsemi auk nánari upplýsinga um t.d. vörur, þjónustu, valmöguleika, sögu og uppruna svo eitthvað sé nefnt. Í raun má segja að hver og ein heimasíða eigi að laga sig eftir þeim tilgangi sem henni er gert að uppfylla í hvert og eitt skipti fyrir hvert og eitt fyrirtæki. Þannig getur heimasíða verið fyrirtæki á vefnum sem selur þjónustu eða vörur. Heimasíðan gæti líka verði einhverskonar upplýsingamiðill eða fróðleiksveita sem styður við eitthvað annað markmið upphafsmanns. Heimasíðan getur verið til þess fallin að skapa trúverðugleika um eitthvað ákveðið málefni eða fyrirtæki sem á í hlut. Heimasíða er í raun tækifæri til að styrkja samskiptagrundvöll fyrirtækis við viðskiptavini sína og er í raun tiltölulega ódýr aðferð við t.d. að auglýsa miðað við aðra auglýsingakosti. Þannig er nóg fyrir þig að koma nafni heimasíðunnar á framfæri víðsvegar og fólk getur svo sjálft af forvitni farið inn og leitað meiri upplýsinga. Heimasíða er mikilvæg í dag í nútíma þjóðfélagi þar sem fá fyrirtæki eru eftir sem ekki eru með heimasíðu. Fólk er fljótt að dæma gæði heimasíðu, hvort sem það hefur hæfileika til að dæma um það eða ekki. Það getur því skipt miklu máli hvort heimasíðan sé gerð svona eða hinsegin. Ef hinsvegar þú hefur hugsað þér ákveðið hlutverk fyrir heimasíðuna og ætlar þér að nota hana í markvissum tilgangi, er mikilvægt fyrir þig að vera ekki of sparsamur í því máli. Það gæti reynst þér dýrkeypt, því það er ávallt hættan á því að þeir peningar sem þú ert að setja í þetta komi ekki þér að gagni. Staðsetning hluta á heimasíðunni, auglýsinga, mynda og annarra upplýsinga getur verið þröngur stakkur búinn og þó að einhver kunni að setja upp heimasíðu, er ekki þar með sagt að hann kunni að hanna heimasíðunna eftir þörfum þínum. Vertu því viss um að spyrja og spyrja og spyrja og komast að því sjálf/ur hvort hlutir séu réttir eða rangir í þessum efnum og leita til réttra aðilla við að dæma um hvort gæði séu með í för. Hafðu samband ef þú ert að stofna fyrirtæki og vantar aðstoð, ég get hjálpað þér.